བླ་མའི་རྣམ་ཐར།

ཤོག་ངོས་འདིའི་ནང་སྐྱབས་རྗེ་པདྨ་སྐལ་བཟང་རིན་པོ་ཆེ་དང་།
སྤྲུལ་སྐུ་གྲགས་པ་རིན་པོ་གཉིས་ཀྱི་རྣམ་ཐར་མཇལ་ཐུབ། 

ང་ཚོས་རེ་ཞུས་ལྟར་སྐྱབས་རྗེ་པདྨ་སྐལ་བཟང་རིན་པོ་ཆེ་མཆོག་ནས་ཡོ་རོབ་ལ་ཕེབས་རྒྱུའི་ཞབས་བཞེས་གནང་བར་སྙིང་ཐག་པ་ནས་བཀའ་དྲིན་ཆེ་ཞུ། སྐྱབས་རྗེ་རིན་པོ་ཆེ་མཆོག་ཕྱི་ལོ་༢༠༠༠ ལོའི་ཕྱི་ཟླ་༤/༥/༦/ པ་བཅས་ལ་ཡོ་རོབ་ནང་ཕེབས་ཏེ། བྷེལ་ཇམ་རྒྱལ་ས་བྷུ་སིལ། ལུག་སེམ་བྷུར། ཌན་མག །ཧྤན་ལན་ཌི། སི་ཝན་ཌན་སོགས་གསུང་ཆོས་བཀའ་དབང་སོགས་བཀའ་དྲིན་སྩལ་གནང་། 

སྐྱབས་རྗེ་པདྨ་སྐལ་བཟང་རིན་པོ་ཆེའི་རྣམ་ཐར་མདོར་བསྡུས།

གྲུབ་པའི་དབང་པོ་མཆོག་སྤྲུལ་པདྨ་སྐལ་བཟང་རིན་པོ་ཆེ་ནི་༡༩༤༣ལོར་བོད་མདོ་ཁམས་ཉི་མ་ཤར་ཕྱོགས་ཀྱི་སའི་ཆ། དལ་འབབ་རྫ་ཆུའི་སྟོད་རྒྱུད་དགེ་རྩེ་འགབ་མ་ཞེས་པའི་སྡེ་བར་ངོ་མཚར་བའི་མཚན་ལྟས་དང་བཅས་སྐུ་འཁྲུངས། བྱིས་པའི་དུས་ཉིད་ནས་སྐྱེས་ཐོབ་ཀྱི་མཁྱེན་རབ་དང་། བྱང་སེམས་ཀྱི་བསླབ་སྤྱོད་སོགས་དམ་པའི་མངོན་རྟགས་རང་ཆས་སུ་མངའ། དེ་ནས་རིང་པོར་མ་ལོན་པར་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་དང་། རྫོགས་ཆེན་ཡིད་བཞིན་ནོར་བུ་འཇིགས་བྲལ་བྱང་ཆུབ་རྡོ་རྗེ། རྫོགས་ཆེན་ཀོང་སྤྲུལ་རིན་པོ་ཆེ་སོགས་དམ་པའི་སྐྱེས་ཆེན་དུ་མ་བཀའ་ལུང་གཅིག་མཐུན་གྱིས་ཟུར་ཆེན་ཆོས་དབྱིངས་རང་གྲོལ་གྱི་རྣམ་རོལ་རིགས་བརྒྱའི་ཁྱབ་བདག་མཁན་ཆེན་པདྨ་བཛྲ་རྩལ་གྱི་སྐུ་ཕྲེང་གསུམ་པར་ངོས་བཟུང་སྟེ། སྔ་འགྱུར་གྲུབ་དབང་རྒྱལ་བ་རྫོགས་ཆེན་པའི་གདན་སའི་གསེར་ཁྲིར་མངའ་གསོལ་མཛད། འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་དང་། རྫོགས་ཆེན་དྲུག་པ། ཡོངས་འཛིན་མཁན་ཆེན་འཇིགས་མེད་ཡོན་ཏན་མགོན་པོ། མཁན་ཆེན་པདྨ་ཚེ་དབང་སོགས་སྐྱེས་ཆེན་མང་པོ་བསྟེན་ཏེ་སྔ་འགྱུར་བཀའ་གཏེར་གཙོར་གྱུར་སྒྲུབ་བརྒྱུད་ཤིང་རྟ་བརྒྱད་ཀྱི་དབང་ལུང་ཕལ་མོ་ཆེ་གསན། ཁྱད་པར་དུ་གདོད་མའི་མགོན་པོ་དང་མི་གཉིས་པ་མཁན་ཆེན་འཇིགས་མེད་ཡོན་ཏན་མགོན་པ་ལས་འོད་གསལ་རྫོགས་པ་ཆེན་པོ་གསང་བ་སྙིང་ཐིག་གོང་འོག་གི་ཟབ་ཁྲིད་མཐའ་དག་ཆིག་རྫོགས་སུ་ཐོབ་པ་སོགས་མདོ་སྔགས་རིག་གནས་ཀྱི་ཟབ་ཁྲིད་དང་། སྨིན་གྲོལ་གདམས་ངག་གི་ཟབ་གནད་བཅས་བུམ་པ་གང་བྱོའི་ཚུལ་དུ་གསན་པས་མཁས་གྲུབ་གཉིས་ལྡན་གྱི་སྐྱེས་བུ་དམ་པར་གྱུར། 
བར་སྐབས་རྒྱལ་བསྟན་ཉམས་རྒུད་དུ་ཕྱིན་པའི་དུས་ཀྱི་ཡོ་ལང་སྟོབས་སུ་བདོ་བའི་བགྲང་བྱ་བཅུ་ཕྲག་གཉིས་ལྷག་རིང་། རྗེ་འདི་ཉིད་ལའང་རྡུང་རྡེག་བརྡབ་གསིག་གི་རྐྱེན་ངན་སྣ་ཚོགས་བྱུང་ཡང་དམ་པའི་རང་གཤིས་མ་འགྱུར་བ་རྒྱལ་བའི་བསྟན་པ་རིན་པོ་ཆེ་བྱི་དོར་མཛད་པའི་མིག་དཔེར་མཁས་བཙུན་བཟང་པོའི་མངའ་བདག་ཏུ་བཞུགས་པ་ནས། གངས་ལྗོངས་བསྟན་པ་ཡང་དར་གྱི་སྐབས་སུ་བླ་ན་མེད་པའི་ཐུགས་སྟོབས་ཀྱི་གོ་ཆ་བགོས་ཏེ་ཆེས་ཉམས་པར་ཕང་པའི་ཆོས་དང་རིག་གཞུང་སླར་གསོའི་བྱ་གཞག་ལ་རླབས་ཆེན་མཛད་རྗེས་སྤྱི་སྟེ། སྐུ་གསུང་ཐུགས་རྟེན་བཟང་ལ་མང་བ་སྐུ་སྲོག་དང་བསྡོས་ཏེ་ཉར་བསྡུ་མཛད། གངས་རིའི་ལྗོངས་སུ་ཆོས་རིག་གི་མེ་རོ་སླར་གསོའི་དུས་རབས་ཏེ་ཕྱི་ལོ་༡༩༨༡ལོར། ཉེ་རབས་བོད་ཁུལ་གྱི་ཆེས་ཐོག་མའི་རིག་གནས་གླིང་ཀ་སི་ཁྲོན་བོད་ཡིག་སློབ་གྲྭ་རྫོགས་ཆེན་དུ་བཙུགས་པར་མཐུན་འགྱུར་ཕྱག་ལས་རྒྱ་ཆེར་གནང་བ་དང་འབྲེལ། སྔ་འགྱུར་རྙིང་མའི་གདན་ས་ཆེན་མོ་རྫོགས་ཆེན་དགོན་སླར་གསོའི་ཐུགས་ཁུར་ཆེད་བཞེས་མཛད། 
ཁྱད་པར་ཕྱི་ལོ་༡༩༨༨ལོ་ནས་ཡུལ་མདོ་ཁམས་ཤར་གྱི་མཁས་པའི་འབྱུང་གནས་རྫོགས་ཆེན་ཤྲཱི་སེང་ཧའི་ལྔ་རིག་ཆོས་གྲྭ་ཆེན་མོ་གཞི་ཁྱོན་ཆེ་བའི་སླར་གསོ་དང་རྒྱ་སྐྱེད་གནང་སྟེ་གངས་ལྗོངས་ཆོལ་གསུམ་ནས་ཕེབས་པའི་ན་གཞོན་སྡེ་སྣོད་འཛིན་པ་སྟོང་ཕྲག་འགའ་བསྐྱེད་བསྲིང་གནང་བ་དང་ཆབས་ཅིག །རིས་སུ་མ་ཆད་པའི་ཆོས་སྡེ་མང་པོར་དབང་ལུང་གདམས་ཁྲིད་ཀྱི་རྒྱུན་དང་འདུལ་བ་གཞི་གསུམ་གྱི་ཕྱག་བཞེས་བཙུགས་པ་སོགས་ཐུབ་པའི་ལུང་རྟོགས་ཀྱི་བསྟན་པ་བཤད་དང་སྒྲུབ་པས་སྤེལ་བའི་མཛད་རྒྱུན་ཕྱི་མའི་མཐར་ཡང་ཉམས་པ་མེད་པའི་ཚེ་སྲོག་བསྩལ་བ་དང་།
ཕྱོགས་དང་རིས་སུ་མ་ཆད་པའི་ཞལ་སློབ་དག་ལ་སྔ་འགྱུར་བཀའ་གཏེར་གྱི་དབང་ཁྲིད་སྤྱི་དང་། ཁྱད་པར་འོད་གསལ་རྫོགས་པ་ཆེན་པོ་སྙིང་ཐིག་གོང་འོག་གི་སྔོན་འགྲོ་དངོས་གཞི་དང་བཅས་པའི་རྒྱས་ཁྲིད་ནས། རྒྱབ་རྟེན་མཛོད་ཆེན་བདུན་དང་། ཤིང་རྟ་རྣམ་གསུམ། སྙིང་ཐིག་ཡ་བཞི་དང་བཅས་པ་རྒྱ་ཆེ་བ་པཎྡི་ཏའི་ལུགས་སུ་མཁས་པའི་རྩལ་ཐོན་པའི་རྒྱས་ཁྲིད་མཛད་པས་དེང་གི་དུས་ན་གངས་རིའི་ལྗོངས་སུ་འོད་གསལ་རྫོགས་པ་ཆེན་པོའི་བསྟན་པའི་བཀའ་བབས་སུ་དོན་གྱིས་གྲུབ་ཅིང་། སྔ་ཕྱིའི་དུས་བར་རྣམས་སུ་སྐུ་མཚམས་བཅད་རྒྱ་ལ་བཞུགས་ཏེ་ཡི་དམ་ལྷའི་བསྙེན་བཟླས་དང་བསྐྱེད་རྫོགས་རྫོགས་ཆེན་གྱི་ཉམས་བཞེས་ལ་བཞུགས་པ་སྡོམ་ན་ལོ་ངོ་བཅུ་ལྷག་ལ་ལོངས། 
མདོར་ན་དམ་པ་འདི་ཉིད་ཀྱི་སྐུ་ཚེ་གང་པོར་མཁས་བཙུན་བཟང་གསུམ་གྱི་དམ་པའི་རྣམ་ཐར་བདག་གིར་བཞེས་ཤིང་། བཤད་སྒྲུབ་ལས་གསུམ་གྱི་མཛད་པ་ཁོ་ནས་གངས་རིའི་ལྗོངས་ཀྱི་ཆོས་རིག་གི་སྒྲོན་མེ་སྦར་བའི་མཛད་རྗེས་ཟླ་མེད་དུ་བསྐྱངས་པར་བརྟེན། གངས་རིའི་མགོན་པོ་༧རྒྱལ་དབང་ཐམས་ཅད་མཁྱེན་པའི་ཞལ་ནས་ཀྱང་། བཤད་དང་སྒྲུབ་པའི་འོད་སྣང་སྟོང་ཕྲག་གིས། །ལུང་དང་རྟོགས་པའི་རྒྱལ་བསྟན་པ༵དྨ༵འི་ཚལ། །སྐ༵ལ་བཟ༵ང་གདུལ་བྱའི་དཔལ་དུ་བཞད་མཛད་པའི། །བསྟན་འཛིན་ཉིན་བྱེད་དབང་པོར་གསོལ་བ་འདེབས། །སྙིགས་མ་ལྔ་ཡི་ཡང་མཐར་ལྷུང་བ་ཡི། །ཕན་བདེའི་རྩ་ལག་གངས་ལྗོངས་རྒྱལ་བའི་བསྟན། །བཤད་སྒྲུབ་སྙིང་པོས་དབེན་པ་འདིར་དགོངས་ལ། །ཞབས་པད་མི་འགྱུར་རིང་དུ་བརྟན་པར་མཛོད། །ཅེས་དང་། དཔལ་ས་སྐྱ་༧གོང་མ་བདག་ཆེན་རིན་པོ་ཆེའི་ཞལ་ནས་ཀྱང་། རྒྱལ་དབང་པ༵དྨ༵འི་མན་ངག་ཆུ་ཀླུང་ཀུན། །རྣམ་དཔྱོད་ཐུགས་མཚོར་འཁྱིལ་བའི་ཀློང་ཟབ་མོར། །རྒྱལ་བསྟན་ནོར་བུ་གདེངས་ཀའི་རྩེར་འཛིན་པ། །སྐ༵ལ་བཟ༵ང་ཀླུ་ཡི་དབང་པོ་ཞབས་བརྟན་ཤོག །མདོ་རྒྱུད་སྤྱི་དང་ཁྱད་པར་སྔ་འགྱུར་གྱི། །བཀའ་བབས་ཕྱག་བཞེས་ཟབ་མོའི་དགོངས་པའི་དོན། །མ་འདྲེས་བརྡ་དོན་འཕྲོད་པའི་གསུང་དབྱངས་ཀྱིས། །གདུལ་བྱའི་བློ་སྒོ་འབྱེད་མཛད་ཞབས་བརྟན་ཤོག །ཅེས་དང་། གཞན་ཡང་གནས་ལྔ་རིག་པའི་པཎ་ཆེན་མཁན་ཆེན་པདྨ་ཚེ་དབང་མཆོག་གི་ཞལ་ནས་ཀྱང་། ཐུ༵བ་བསྟ༵ན་ལུ༵ང་དང་རྟོགས༵་པའི་ཡིད་བཞིན་དབང་། །བཤད་དང་སྒྲུབ་པའི་ལྷ་གོས་རྩེར་མཆོད་ནས། །བསྟ༵ན་པ༵འི་རྒྱ༵ལ་མཚ༵ན་སྲིད་རྩེར་བསྒྲེང་མཛད་པའི། །སྐྱེས་མཆོག་དམ་པ་བསྐལ་བརྒྱར་འཚོ་གཞེས་གསོལ། །སོགས་དོན་གནས་མཁས་པའི་གསུང་གིས་མངོན་པར་བསྟོད་ཅིང་བསྟན་འགྲོའི་དཔལ་དུ་ཞབས་པད་བརྟན་པར་བདེན་ཚིག་གྲུབ་པའི་གསུང་གིས་ནན་བསྐུལ་མཛད། 
སྤྱིར་རྗེ་འདི་ཉིད་འཕགས་ཆེན་དམ་པའི་སྐྱེས་བུ་སྙིགས་མའི་དུས་འདིར་བསྟན་འགྲོའི་དཔལ་མགོན་དུ་བསམ་བཞིན་བྱོན་པའི་ཚུལ། སྔོན་བྱོན་ཚད་གྲུབ་ཀྱི་དམ་པ་དུ་མའི་སྒྲིབ་མེད་གསལ་བའི་ལུང་བྱང་ལས་མཚན་དང་། གདན་ས། མཛད་འཕྲིན་བཅས་མ་ནོར་གསལ་བར་བསྟན་པ་སྟེ། ཀརྨ་པ་དེ་བཞིན་གཤེགས་པའི་ལུང་བསྟན་གྱི་མགུར་ལས། མདོ་ཁམས་ཟལ་མོ་སྒང་རྒྱུད་དུ༔ ལས་ཅན་སྐྱེས་བུ་སྟོན་ཟླའི་མདོག༔ ཆོས་དབྱིངས་འགྱུར་མེད་གཤིས་ལ་རྫོགས༔ འབྲེལ་ཚད་པདྨ་འོད་དུ་འདྲེན༔ དེ་ལས་མདོ་ཁམས་པདྨའི་ཚལ༔ ས་ལ་སྤྱོད་པའི་གདན་ས་དེར༔ གནས་བརྟན་སྤྲུལ་པ་ངུར་སྨྲིག་འཛིན༔ འབྲེལ་ཚད་དོན་དང་ལྡན་པ་ཡིན༔ ཞེས་དང་། རྡོ་གྲུབ་ཆེན་གྱི་འབྱུང་འགྱུར་ལུང་བསྟན་གསལ་བའི་མེ་ལོང་ལས། མདོ་ཁམས་ཡུལ་ནས་པདྨའི་མིང་ཅན་གྱིས༔ ནགས་ཁྲོད་གངས་འདབ་པདྨ་ཐང་ཆེན་དུ༔ སྔར་མེད་གནས་སུ་རྟེན་བཞེངས་འགྲོ་བ་སྐྱོབས༔ ཞེས་དང་། གཡོན་རུ་གཏེར་སྟོན་པདྨ་བདུད་འདུལ་གླིང་བའི་དག་སྣང་ལུང་བསྟན་དྭངས་གསལ་མེ་ལོང་ལས། སྒྲུབ་སྡེ་ཤྲཱི་སེངྷ་ཡི༔ མི་འཇིགས་སེངྒེའི་ཁྲི་མཆོག་ལ༔ གདོང་ལྔ་དབང་པོས་ངར་སྐད་འབྱིན༔ པདྨའི་ཐུགས་སྤྲུལ་པདྨའི་མཚན༔ རྒྱལ་བསྟན་སྤྱི་དང་བྱེ་བྲག་གི༔ དགེ་ལེགས་ཡོན་ཏན་ཉིན་མོར་བྱེད༔ བཤད་སྒྲུབ་བསྟན་པ་སྤེལ་བ་ཡི༔ པད་གཞོན་མང་པོའི་འདབ་སྟོང་འཛུམ༔ ཞེས་དང་། པདྨ་གར་དབང་གླིང་པའི་གནས་ཡུལ་མཁའ་འགྲོའི་བརྡ་གླུ་ལས། གནས་རུ་དམ་ཨོ་རྒྱན་བསམ་གཏན་གླིང༔ དེའི་ཉེ་འཁོར་བསྟན་གཉིས་རྒྱས་པའི་ཚལ༔ རྗེ་གྲུབ་པའི་དབང་ཕྱུག་པདྨའི་མཚན༔ དགོན་དེ་ཡི་རྒྱན་དུ་ཆས་སྲིད་ན༔ བསྟན་གཞི་ཀུན་སྔར་ལས་ལྷག་པར་རྒྱས༔ ཡུལ་དེ་ལ་བདེ་སྐྱིད་ཉི་འོད་གསལ༔ ཞེས་སོགས་བསླུ་མེད་རྡོ་རྗེའི་ལུང་གིས་ལན་གཅིག་མིན་པར་ཡང་ཡང་བསྔགས་པར་མཛད། 
རྗེ་ཉིད་ཀྱི་ཞལ་གསུང་དྲི་མ་མེད་པའི་ལེགས་བཤད་ཀྱི་ཕུང་པོ་ཕྱི་རབས་བསྟན་པའི་བཙས་སུ་བཞག་པ་ནི། རྫོགས་པ་ཆེན་པོ་ཀོང་ཆེན་སྙིང་ཐིག་གི་སྔོན་འགྲོའི་ཁྲིད་ཡིག་ཀུན་བཟང་བླ་མའི་ཞལ་ལུང་གི་ལྗགས་ཁྲིད་མཚུངས་མེད་བླ་མའི་ཞལ་རྒྱུན། ཀློང་སྙིང་སྔོན་འགྲོའི་ངག་འདོན་རྣམ་མཁྱེན་ལམ་བཟང་གི་ལྗགས་ཁྲིད་སྐལ་བཟང་ཐར་པའི་ལམ་སྟོན། རྫོགས་ཆེན་ཀློང་ཆེན་སྙིང་ཐིག་གི་ཐུན་མོང་སྔོན་འགྲོ་སེམས་སྦྱོང་བདུན་གྱི་དོན་ཁྲིད་ཐར་པའི་ཐེམ་སྐས་ཀྱི་ཟིན་ཐུན་མཚོ་སྐྱེས་བླ་མ་དགྱེས་པའི་ཞལ་ལུང་། ཁྲིད་ཡིག་ཡེ་ཤེས་བླ་མའི་རྒྱས་འགྲེལ་བརྒྱུད་གསུམ་བླ་མའི་ཞལ་ཆབ། ཚིག་དོན་རིན་པོ་ཆེའི་མཛོད་ཀྱི་འགྲེལ་བ་མན་ངག་ནོར་བུའི་བང་མཛོད། མན་ངག་རིན་པོ་ཆེའི་མཛོད་ཀྱི་འགྲེལ་བ་གདམས་ཟབ་ནོར་བུའི་གཏེར་མཛོད། ཡིད་བཞིན་རིན་པོ་ཆེའི་མཛོད་ཀྱི་འགྲེལ་བ་རྨོངས་མུན་འཇོམ་པའི་སྣང་མཛོད། ཆོས་དབྱིངས་རིན་པོ་ཆེའི་མཛོད་ཀྱི་འགྲེལ་བ་ཀུན་ཏུ་བཟང་པོའི་དགོངས་མཛོད། འཇམ་མགོན་མི་ཕམ་རྒྱ་མཚོའི་གསུང་རྫོགས་པ་ཆེན་པོ་སེམས་ངོ་མཛུབ་ཚུགས་ཀྱི་གདམས་པའི་གནད་འགྲོལ། བླ་སྒྲུབ་རིག་འཛིན་འདུས་པའི་རྣམ་བཤད་རིག་འཛིན་བརྒྱུད་པའི་ཞལ་ལུང་། ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ལས་བྱང་ཚོར་བ་རང་གྲོལ་གྱི་སྙིང་པོའི་རྣམ་བཤད་རིམ་གཉིས་གསལ་བྱེད། བདེ་བ་ཅན་གི་ཞིང་གི་སྨོན་ལམ་ཚིག་དོན་གོ་སླ་བར་བཀྲལ་བ་ཐར་ལམ་བགྲོད་པའི་ཐེམ་སྐས། བདེ་སྨོན་འགྲེལ་བ་རིན་ཆེན་པདྨ་རཱ་གའི་ཕྲ་ཚོམ། སྙན་རྩོམ་གླེགས་བམ་སྔ་ཕྱི་གཉིས་བཅས་རྨད་དུ་བྱུང་བའི་ལེགས་བཤད་ཀྱི་ཕུང་པོ་བཞུགས་པ་བཅས་ཐུན་མོང་ཕྱིའི་རྣམ་ཐར་ཉུང་བཏུས་མདོ་ཙམ་སྨྲོས་པ་སྟེ། རྗེ་འདིའི་མཁས་པའི་རྣམ་དཔྱོད། བཙུན་པའི་ཚུགས། གྲུབ་པའི་དགོངས་སྤྱོད། བཟང་པོའི་ཕྲིན་ལས་བཅས་གསང་བ་བསམ་མི་ཁྱབ་པའི་ཡོན་ཏན་མཐའ་དག་ཉུང་ངུའི་ངག་གིས་བརྗོད་པ་ག་ལ་ནུས། 
དེ་དང་དུས་མཚུངས་ཨ་རི། དབྱིན་ཇི། ཧྥ་རན་སི། སུད་སི། འཇར་མེན་སོགས་ཕྱི་གླིང་པའི་རྒྱལ་ཁབ་ཁག་མང་པོར་བསྟུད་མར་ཕེབས་ཏེ་བོད་ཀྱི་ཆོས་དང་རིག་གཞུང་ལ་འཇུག་འདོད་ཀྱི་ཆེད་མཁས་དང་། ཞིབ་འཇུག་པ། ཆོས་དད་པ་སོགས་རིགས་མི་གཅིག་པའི་སྐྱེ་བོ་མང་པོའི་སེམས་ཁམས་ལ་གཞན་ཕན་དང་ཞི་བདེའི་བདེ་དྲོད་བསྩལ་བ་སོགས་ལེགས་མཛད་ཕྲིན་ལས་ཀྱི་འོད་སྣང་གསར་པ་ཕྱོགས་ཀྱི་མུ་མཐར་ཁྱབ་པ་སྐྱོང་བཞིན་བསྟན་དང་འགྲོ་བའི་དཔལ་མགོན་དུ་འཚོ་ཞིང་གཞེས་པ་ལགས་སོ།།

ཕྱི་ལོ་༢༠༢༣ ལོའི་༡ ཚེས་༡༣ ཉིན་ཞུ་བསྒྲིགས་བྱས། 

གཙུག་ལག་སློབ་གྲྭ་ཆེན་མོའི་གུང་གསེང་དང་བསྟུན་ ༡༩༩༩ ལོར་སྤྲུལ་སྐུ་གྲགས་པ་རིན་པོ་ཆེས་བྷེལ་ཇམ་གྱི་རྒྱལ་ས་བྷུ་སིལ་ནང་གསུང་ཆོས་གནང་ཐེངས་དང་པོ་གནང་། དེ་ནས་བཟུང་ཧ་ལམ་ལོ་ལྟར་ཡོ་རོབ་ནང་ཕེབས་ཏེ་གསུང་ཆོས་གནང་བཞིན་ཡོད། ཁོང་གིས་སྤྲོ་སྣང་དང་སློབ་མ་ཚོར་བརྗོད་དོན་གཏིང་ཟབ་དག་ཐད་ཀར་ངོ་སྤྲོད་བྱེད་ཐབས་དེར་ནུབ་ཕྱོགས་སློབ་མ་ཚོས་བསྔགས་བརྗོད་ཡང་ཡང་ཐོབ་ཀྱི་ཡོད།

སྤྲུལ་སྐུ་གྲགས་པ་རིན་པོ་ཆེའི་རྣམ་ཐར། 

འདི་ནས་ཁྱེད་ཀྱིས་སྤྲུལ་སྐུ་གྲགས་པོ་རིན་པོ་ཆེའི་རྣམ་ཐར་ཁོང་གི་དྲ་ཚིགས་ནས་མཇལ་ཐུབ། 
(Tulku Dakpa Rinpoche's Website.)